Anavos sin via da success
Franco Curschellas | Ivan Decurtins | ||
Renato Curschellas | Simon Decurtins | Pirmin Monn | Remo Flepp |
Fabio Tenner | Simon Caduff | Silvio Candinas | |
Pirmin Lombris | Christoffel Giger |
Reservas:
Deck Simon, Monn Rawin, Travassos Rafael
Absenzas:
Schmuki Matthias, Degonda Maurizio, Flepp Adrian (Jun. A), Deflorin Ursin (Jun. A)
gols:
4. min. 1 : 0 Ivan Decurtins
8. min. 2 : 0 Ivan Decurtins
14. min. 3 : 0 Remo Flepp
24. min. 4 : 0 Ivan Decurtins
Suenter la victoria a Trun avon in’jamna ei il capogruppa da Bad Ragaz staus hosp a Sedrun. Igl atun vargau veva Bad Ragaz dominau il giug pli u meins claramein e tarmess ils Sursilvans a casa senza puncts. A Sedrun ei succediu exactamein il cuntrari. Sedrun/Mustér ha dominau il giug dad a tochen z - oravontut l’emprema mesadad – e tarmess quels dalla val ora cun ina pulita schleppra.
Gia suenter strusch 10 minutas meina Sedrun/Muster cun dus gols avantatg. Ella 4. minuta reussescha ei ad Ivan da conquistar il bal avon la zona da puniziun. Cun in ferm siet da distanza, plazzaus el cantun liung, marca el via la pétga igl impurtont emprem gol per l’equipa da casa. Quei gol dat ulteriur slontsch e curascha als giugadurs, pertgei mo 4 minutas pli tard marca danovamein Ivan il 2:0 per S/M. Cun in ferm e beinplazzau culp liber batta el ord biabein 25 m il goli da Bad Ragaz. Perschuadida ch’igl adversari ei da batter quella sera, metta l’equipa da casa vinavon sut pressiun ils hosps. All’equipa songagliesa reussescha ei buca da tener petg ed aschia crodan aunc dus ulteriurs gols avon pausa. Ella 14. minuta marca Remo il 3:0. Suenter ina liunga remessa laterala (Einwurf) meina Pirmin Monn il bal cul tgau ella pétga, danunder che quel rebatta avon ils peis da Remo che neginas difficultads da spedir il bal ella reit. Mo 10 minutas pli tard croda il 4:0 entras in bellezia gol dad Ivan. Sill’altezia dil punct da penalti spedescha el in corner cun in ferm siet direct e volley ella reit. Veramein in gol che gartegia ad in giugadur mo mintga quater gievgias. Cun empau clétg e stupentas acziuns digl agen goli vegn Bad Ragaz dad evitar ulteriurs gols. Schanzas da marcar in gol ha Bad Ragaz absolutamein neginas duront l’emprema mesadad.
Suenter il tè da pausa vegn Bad Ragaz meglier el giug. Igl emprem quart d’ura suenter pausa prendan els il giug enta maun ed emprovan da far pressiun entras in ballapei cun dabia moviment e cumbinaziuns sur pliras staziuns ora. Duront quella fasa ha S/M breigia da tener ulivau il giug. La defensiun ei denton attenta e lai tier mo paucas caschuns da num als hosps. Pli ditg ch’il giug cuoza e pli clar ch’ei daventa als giugadurs da Bad Ragaz che las trocclas pendan quei di memia lunsch ad ault.
Fazit: Ina clara ed oravontut meritada victoria per l’equipa da casa. Reussescha ei da cuntinuar cun talas prestaziuns, duess ei esser pusseivel da aunc recaltgar bein enqual punct els giugs che suondan questa primavera. Malgrad la buna prestaziun collectiva dall’entira equipa sedistingua Ivan Decurtins cun ses treis bials gols ord il miez dall’equipa. Il tetel sco giugadur dil di di s’auda per quei giug ad el.