Clara victoria encunter Tavanasa II
CB Sedrun/Mustér
7 Monn Nico A. | 13 Decurtins Ivan | ||
1 Curschellas Renato | 2 Decurtins Simon | 10 Bundi Serafin | 9 Deck Simon |
3 Tenner Fabio | 6 Monn Pirmin | 16 Monn Rawin | |
14 Candinas Silvio | 15 Monn Rawin |
Reservas : Flepp Remo, Bearth Gian Andri, Travassos Rafael
Absents: Schuoler Flavio, Giger Christoffel, Schmuki Matthias (absents), Lombris Pirmin (reconvalescents), Monn Riccardo (blessaus)
Gols :
15. min. | 1 :0 | Deck Simon |
20. min. | 1 :1 | Rüetschi Manuel |
28. min. | 2 :1 | Bundi Serafin |
40. min. | 2 :2 | Rüetschi Manuel |
42. min. | 3 :2 | Decurtins Simon |
48. min. | 4 :2 | Decurtins Ivan |
Sedrun/Mustér entscheiva il giug fetg concentrau e vegn bien e spert tier las empremas bunas acziuns. Gia suenter 5 minutas emprova Pirmin Monn ora il goli da Tavanasa cun in ferm siet da distanza. Lez ei denton attents e sin siu post. Cuort sisu spendra la petga per Tavanasa. Serafin Bundi vegn tiel bal avon la zona da puniziun, semeina e sieta sin gol – tucca denton mo la petga. L’equipa da casa dominescha claramein il giug e vegn cuntinuadamein tier pusseivladads da marcar. Ella 15 min. va S/M cun 1 :0 en avantatg. In defensur da Tavanasa vegn buca da deliberar tenor giavisch. Simon Deck vegn cuort avon la zona da puniziun tiel bal e lai negina schanza al goli cun in ferm siet el cantun liung. S/M fa vinavon pressiun. Encunter il decuors dil giug meina ina cunterattaca ella 20 min. tier igl 1:1. In attacader da Tavanasa vegn lantschaus cun in bal liung e quel aulza il bal sur il goli ora, il qual era plazzaus memia anavon. Cuort suenter danovamein ina fetg buna occasiun per ils hosps. Quella gada munchenta il giugadur denton il gol. Silsuenter pren S/M puspei il giug enta maun. Pliras bunas pusseivladads vegn denton munchentadas. Ella 23 min. survegn Ivan Decurtins il bal cul dies enviers il goli. Quel tegn denton il siet ord cuorta distanza cun ina stupenta parada. Cuort suenter spidescha Simon Deck in bal ord 5 meters sur la latta ora – in’ulteriura grondiusa caschun. Ella 28 min. croda il secund gol per S/M. Simon Decurtins canunescha in siet ord rodund 30 meters ella petga, Serafin Bundi vegn tiel bal rebattiu e marca il 2 :1. L’equipa da casa dominescha vinavon. Danis/Tavanasa egalisescha ella 40 min. e quei cun ina copia digl emprem gol. Ella 42 min. il 3 :2 per Sedrun/Mustér. Simon Decurtins spidescha in corner cul tgau sut la latta en.
Suenter pausa pli u meins il medem maletg. L’equipa da casa pren il giug enta maun e fa pressiun. Quella pressiun ei denton buca pli aschi ferma sco avon pausa. Ella 48 min. meina quella denton tuttina al quart gol per S/M. Ivan Decurtins reagescha il pli spert e marca suenter in bal rebattiu il 4 :2 cul tgau ord cuorta distanza. Duas minutas pli tard vegn Remo Flepp mess a tiara ella zona da puniziun. Ina veglia regla da ballapei di, che quei giugadur, encunter il qual il foul ei vegnius commess, duess mai sittar sez il penalti. E quella regla semanifestescha danovamein, pertgei el fallescha il penalti.
Il rest dil giug ei beingleiti raquintaus. Sedrun/Muster tegn il giug sut controlla, fa quei ch‘ei necessari e buca dapli. A Danis/Tavanasa reussescha ei quella sera buca da metter sut squetsch igl adversari.
Fazit : Senza discussiun in victoria meritada encunter in adversari che ha ils davos onns meinsvart procurau per mal il tgau sisum la Cadi.